З 23 па 29 чэрвеня каманда Прававой ініцыятывы і Міжнароднага камітэта па расследаванні катаванняў у Беларусі сёмы раз праводзіць кампанію "Тыдзень супраць катаванняў", прымеркаваны да Міжнароднага дня ААН у падтрымку ахвяр катаванняў (26 чэрвеня).
Сумесна з партнёрамі арганізатары падрыхтавалі цыкл мерапрыемстваў анлайн і афлайн (Варшава/Вільня). Яны запрашаюць далучыцца да іх, каб як мага больш людзей ведала і памятала пра тое, што ў Беларусі адбываецца сістэмны гвалт і што гэта прамое парушэнне правоў чалавека.
Увага: праграма абнаўляецца. Сачыце за апдэйтамі тут
ВІЛЬНЯ
25 Чэрвеня, 10:00
КАНФЕРЭНЦЫЯ "ЖАНЧЫНЫ Ў ЗНЯВОЛЕННІ: НЯБАЧНЫ БОЛЬ ПЕНІТЭНЦЫЯРНАЙ СІСТЭМЫ БЕЛАРУСІ"
Беларусь працягвае займаць сумнае лідарства ў Еўропе не толькі па колькасці зняволеных на душу насельніцтва, але і па колькасці зняволеных жанчын. Паводле нашых звестак, у беларускіх турмах утрымліваецца не менш за 30 000 чалавек, з якіх каля 10 % — жанчыны. Сярод палітвязняў жанчыны складаюць ужо амаль 15%.
Трагічныя выпадкі смерці Ганны Кандрацэнкі ды Тамары Каравай неўзабаве пасля вызвалення толькі падкрэсліваюць неабходнасць усебаковага аналізу ролі турэмнай медыцыны.
На канферэнцыі 25 чэрвеня каманда "Лекары за праўду і справядлівасць" прадставіць:
— вынікі комплекснага даследавання аб стане здароўя і правах жанчын у зняволенні;
— сведчанні тых, хто прайшоў праз сістэму турмаў;
— выступленні экспертаў у галіне медыцыны, права і псіхалогіі.
Адрас: канферэнц-зала Conti Hotel — Raugyklos g. 7
Рэгістрацыя па спасылцы
Арганізатары: Лекары за праўду і справядлівасць
26 чэрвеня
Адкрытая лекцыя з Prof. Christopher Einolf (Northern Illinois University)
Прававая ініцыятыва запрашае вас на адкрытую лекцыю з прафесарам Крыстаферам Айнолфам, прысвечаную тэме палітычнага гвалту і механізмаў яго прадухілення.
Тэма: Why They Torture: Institutional Violence, Political Control, and the Struggle for Prevention in Belarus and Beyond
Час і месца: to be announced
27 чэрвеня а 19:00
ПРЭЗЕНТАЦЫЯ КЛІПА "СИЖУ НЕ ЗА СЕБЯ"
У межах "Тыдня супраць катаванняў" запрашаем вас на адмысловае мерапрыемства — прэзентацыю музычнага кліпа "Сижу не за себя", створанага нашай камандай і прысвечанага палітвязням у Беларусі.
Так, мы гаворым пра катаванні, аб невыносных умовах у месцах пазбаўлення волі, болю, несправядлівасці і страху. Але мы хочам казаць пра гэта інакш, праз новыя формы і не губляючы надзеі.
У праграме:
- прагляд кліпа на вялікім экране
- міні-сесія "пытанне-адказ" са стваральнікамі квіза па правах чалавека (так, з прызамі!)
- спецыяльныя напоі ды іх дэгустацыя (будзе смачна і трохі весела)
- і проста жывыя зносіны, якіх нам усім не хапае
Дрэс-код: будзем рады, калі вы падтрымаеце эстэтыку кліпа, якую мы называем "дваровая рамантыка": нешта ў духу шансона, вулічнай лірыкі і бытавой філасофіі.
Адрас: крама сувеніраў "Кропка", Savičiaus g. 6
Рэгістрацыя па спасылцы
Колькасць месцаў абмежаваная!
ВАРШАВА
22 чэрвеня, 18:00
ПУБЛІЧНАЯ ДЫСКУСІЯ: "ДОСВЕД ГВАЛТУ І ШЛЯХІ ПАДТРЫМКІ: ГОЛАС КВІР-СУПОЛЬНАСЦІ"
У межах "Тыдня супраць катаванняў", TG House сумесна з "Прававой ініцыятывай" запрашае на публічную дыскусію, прысвечаную досведу квір-персон, што пацярпелі ад рэпрэсій, гвалту і пераследу.
У дыскусіі возьмуць удзел актывіст_кі і праваабаронцы, а таксама квір-персоны, гатовыя падзяліцца сваімі гісторыямі. Мы будзем казаць пра перажыты досвед, пра тое, праз што давялося прайсці, і пра тое, якая падтрымка сапраўды патрэбная супольнасці цяпер.
Пачатак а 18:00
Рэгістрацыя па спасылцы
з 21 чэрвеня па 01 ліпеня
ВЫСТАВА "НІЧОГА АСАБЛІВА НОВАГА"
Назва выставы адсылае да фразы, што часта паўтараецца ў лістах беларускіх палітвязняў — спробы схаваць боль і аднастайнасць турэмнай руціны. Аднак за гэтай будзённасцю — жывая тканіна несправядлівасці, праз якую прайшлі тысячы людзей. У экспазіцыі прадстаўленыя асабістыя рэчы палітвязняў, перададзеныя ў калекцыю музея: бытавыя прадметы, фрагменты лістоў, вершы, аўдыёзапісы — усё гэта становіцца дакументам часу і эмацыйным сведчаннем супраціву.
Адрас: Музей Вольнай Беларусі ul. Foksal 11, Warsaw
Арганізатар: Музей Вольнай Беларусі
АНЛАЙН
24 чэрвеня
ПУБЛІКАЦЫЯ І ПРЭЗЕНТАЦЫЯ РАССЛЕДАВАННЯ "Катаванні ды жорсткае абыходжанне ў папраўчай калоніі №17 г. ШКЛОВА"
Прававая ініцыятыва і Міжнародны камітэт па расследаванні катаванняў у Беларусі прадстаўляюць маштабнае расследаванне аб умовах утрымання і жорсткім абыходжанні са зняволенымі ў папраўчай калоніі №17 (г. Шклоў), заснаванае на аналізе 18 інтэрв'ю з былымі палітвязнямі, прызнанымі палітычнымі. Дакумент падрабязна апісвае атмасферу страху і гвалту, бытавыя ўмовы, працу і медабслугоўванне, нефармальную іерархію, што падтрымліваецца адміністрацыяй, а таксама ролю канкрэтных супрацоўнікаў калоніі. Асаблівая ўвага нададзена смерці Вітольда Ашурка, якая стала сімвалам жорсткасці сістэмы. Мы фіксуем грубыя парушэнні міжнародных стандартаў, называем імёны адказных, у тым ліку начальніка калоніі Аляксандра Карніенкі, ды захоўваем сведчанні для будучага правасуддзя.
Закрытая анлайн-прэс-канферэнцыя для журналістаў.
25 чэрвеня, 17:00 па Мінскім часе
ПРЭЗЕНТАЦЫЯ НАЦЫЯНАЛЬНАГА ІНДЭКСА ПРАВОЎ ЧАЛАВЕКА АД БЕЛАРУСКАГА ХЕЛЬСІНКСКАГА КАМІТЭТА
Беларускі Хельсінкскі Камітэт правядзе анлайн-прэзентацыю ацэнкі стану права на свабоду ад катаванняў у 2024 годзе ў межах Нацыянальнага Індэкса правоў чалавека, які з 2019 года штогод ацэньвае сітуацыю з правамі чалавека ў Беларусі. У распрацоўцы Індэкса ўдзельнічаюць вядучыя эксперты грамадзянскай супольнасці.
Падчас размовы з Паўлам Сапелкам, адным з экспертаў Індэкса, абмяркуем сітуацыю з правам не падвяргацца катаванням за 2024 год, а таксама адкажам на пытанні ўдзельнікаў.
Спасылка на мерапрыемства будзе дасланая зарэгістраваным удзельнікам.
Чаканая працягласць мерапрыемства 1 гадзіна.
Арганізатар: Беларускі Хельсінкскі Камітэт
25 чэрвеня
ПРЭЗЕНТАЦЫЯ МАТЭРЫЯЛУ ПА ВІДАХ КАТАВАННЯЎ
Міжнародны камітэт па расследаванні катаванняў у Беларусі рыхтуецца прадставіць грамадскасці ўнікальнае даследаванне, якое не мае аналагаў. Упершыню на аснове задакументаваных выпадкаў катаванняў, сабраных за амаль пяць гадоў працы, быў складзены падрабязны аналіз рэпрэсіўнай машыны рэжыму — з класіфікацыяй відаў гвалту, апісаннем метадаў, псіхалагічных і фізічных наступстваў, а таксама ўказаннем на канкрэтныя месцы і выканаўцаў.
Гэты матэрыял — вынік дасціпнай працы дакументатараў, якія з 2020 года фіксуюць сведчанні пацярпелых, нягледзячы на рызыкі і закрытасць беларускай пенітэнцыярнай сістэмы. У ім выкарыстаныя рэальныя гісторыі людзей, якія прайшлі праз збіццё, сексуалізаваны гвалт, утрыманне ў "позах болю", шантаж, пагрозы, змяшчэнні ў карцары ды іншыя формы жорсткага абыходжання.
Сачыце за нашымі абнаўленнямі і анонсамі ў сацыяльных сетках.
з 28 па 29 чэрвеня
АНЛАЙН ПАКАЗ МОНАСПЕКТАКЛЯ "ПОСЛЕЗАВТРА БУДЕТ ЗАВТРА"
Прававая ініцыятыва запрашае вас на анлайн-паказ монаспектакля "Послезавтра будет завтра" з акцёрам Паўлам Гарадніцкім. Спектакль заснаваны на рэальнай гісторыі, якую мы дакументавалі разам з іншымі сведчаннямі людзей, што пацярпелі ад палітычных рэпрэсій. Гэта час, у якім вы разам з героем зможаце пасмяяцца, пасумаваць і памарыць, нягледзячы ні на што. Таму што нават у зняволенні ў героя застаецца галоўнае — годнасць, чалавечнасць і надзея.
Спектакль будзе дасяжны толькі 28 і 29 чэрвеня на нашым YouTube-канале.
Спасылка з'явіцца ў дзень паказу.
